2024/05/22
湯文亮
我見到有名品牌邀請信畀老婆，可以在名牌貨品公開發售之前優先選購，我老婆順手將邀請信掉咗去，我唔係幾明，優先選購一定有着數，唔買都去睇吓。
公開發售時打折 優先買家唔見錢
老婆話試過幾次同一大班大媽去睇吓，結果大家都買了不少，優先選購之後就公開發售，名牌公司很多時都會在公開發售時打折，令到優先選購的買家還未有機會使用，就已經唔見了一大筆錢，現在大家對優先選購提唔起興趣，所以掉了那張邀請信。
近日有不少新樓盤買家撻訂，他們大多數是首次置業者，在政府「辣招」之下，他們變成「優先選購者」，以為在沒有競爭對手之下，自己是大贏家。其實，沒有競爭對手即是沒有購買力，樓價又點會升，政府害死他們，好彩政府及時「撤辣」，否則那些首次置業者輸得仲多。不過，現在都輸唔少，有不少當時買入的單位已經變成負資產，真係喊都無謂。
政府及時「撤辣」 免首置者輸更多
我問過那些當時買樓的人，點解明知道「辣招」鎖死購買力，結果樓價必然下跌，咁嘅情况都買樓，似乎相當不智，最好做法就是學大媽將那些「優先選購邀請信」掉咗去，政府唔「撤辣」就唔會買樓。他們話做唔到，因為當時見到有不少人願意付15%至30%特別印花稅買樓，自己有如此「特權」，唔買就笨。
答案令我想起名牌公司可以效法政府，就算冇邀請信都可以優先選購，不過要畀30%附加費；如果有人願意畀附加費買名牌，我唔信那班揸住邀請信的大媽唔買，更加唔會掉咗封邀請信。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
