《保命可以 保本難》

我相信很多人唔明白保本保命的意思，保本代表唔使輸錢，相信唔係太多物業投資者可以做到，只要他們在過去幾年曾經買入物業，或多或少都要輸錢。

簡單來說，即是保唔到本，但由於借貸比率不高，即使樓價下跌兩三成，但仍然未輸到入肉，必要時將物業賣走便可以解燃眉之急，咁就可以保到條命；如果投資者賣走晒所有物業仍然是負資產，咁樣就真係連命都保唔到。不過，現在情况亦不是太壞，大多數物業投資者保命可以，但保本就艱難。

逆周期措施 救了投資者

點解投資者可以保到命？嚴格來說，就是借貸比率不高；不過，借貸比率不高並不是物業投資者自願，而是被金管局強制，上一任金管局陳總裁用一個逆周期措施，將物業借貸比率由七成下降至四成，仲要計壓力測試，租金收入等難關。當時，大多數物業投資者都不滿意，認為金管局限制他們的投資，銀行亦不滿意，逆周期措施令他們少做很多地產投資生意，但估唔到這個逆周期措施，救了不少投資者，就算要輸錢，但仍然可以保命；否則，當樓價下跌兩三成，已經有不少物業投資者輸命。

而且如果沒有逆周期措施，在長期低息環境下，樓價會先急升，後急跌，最後一定會有很多地產佬輸到入肉，甚至要破產，咁樣就真係不但本保唔到，命都保唔到，現在都算好彩，即使保唔到本，最低限度可以保到條命。