2024/04/24
湯文亮
多年前我有一次去日本，老友請我去食頂級壽司，師傅是大師級，不苟言笑，甚至連我們傾偈都唔得，要專心欣賞他的手藝與食材。無可否認，兩樣都是頂級，手藝不用說，大師傅對於用料很執着，唔好講邊角，質素稍為差啲都唔會用，明明是三個人用大拖羅，切到僅僅夠兩個人用，據聞餐廳老闆經常對客人投訴話大師傅太浪費，不過，餐廳有錢賺，老闆亦冇符。
兩年之後再去日本，本來想再去那家壽司店，老友話大師傅同老闆頂了間壽司店，唔使幾耐，壽司店因為冇生意執笠了。不過，大師傅現在替一家小店打工，又唔知點解，人龍又再現，今晚可以去試吓，大師傅知道我去，專登留了兩個位給我們。
在壽司吧坐低，大師傅自嘲自己冇老闆命，替人打工生意不知幾好，自己做就拍烏蠅，大師傅唔知道，替人打工就捨得，自己做就唔捨得，一件可以切成三人份的大拖羅，替人打工能夠切到兩人份，自己做就可以切到四人份，顧客是精明的，會用腳來表達意見。
這個經歴是我半年前講畀一個做餐廳的老友聽，老友話生意不好，打算將食材分量減少，以及採用較便宜的食材。我話千祈唔好，應反其道而行，應該提高食材質素，加大份量，生意才會有起色。
老友最後聽我講，現在餐廳已成網紅店，日日排長龍，做生意偷工減料不但不可以起死回生，甚至會加速滅亡。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
