2024/04/11
湯文亮
「撤辣」之後新樓盤銷售，買家大多數是內地人，如果唔信，大可以去各新樓盤售樓處聽下，大多數買家都是講普通話；不過，買樓的人雖然是內地人較多，但銷售額則各佔一半，因為內地人只買一個單位，買兩個的都很少，但買樓的香港人很多都是「西餅客」，一打一打咁買。老實說，話晒都忍咗咁耐，現在買多啲都無可厚非。
有人話，一般內地人唔係咁容易轉錢來香港，現在買樓，會不會最後成交唔到要撻訂？那些人可能唔知道，內地人不是今時今日才打算在香港買樓，而是已經準備了幾年，不過，政府要收取30%「辣招」印花稅，而且樓價又咁高，當然唔會買。不過，這不會打消內地人買樓雄心，早已糧草先行，他們以螞蟻搬家方法將資金轉到香港，打算香港「撤辣」後才買，唔經唔覺已經幾年，打算買樓的內地人早已儲到一大筆現金，所以，現在買樓是絕無資金困難，擔心他們沒有足夠資金只是過分憂慮而已。
今次真係遲買好過早買，如果他們在兩三年之前買樓，不但樓價比現在最少高20%，仲要畀30%印花稅。仲有，由於他們早已將資金轉到香港，剛好人民幣貶值，雖然幅度唔係咁大，但亦慳到5%至8%，加加埋埋，內地人現在買樓，比3、4年前慳了約60%，真係唔買就笨。
當一般香港人了解到這個情况而急起直追，可能要畀錢人賺買「摩貨」，真係諗極都唔明，點解土生土長的香港人在買樓方面輸給遠道而來的內地人。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
