2024/03/27
湯文亮
外媒報道，香港有iBanker失業17個月，每次搵工都與幾百人一齊申請，外媒的意思是香港的營商環境很差，不但要長時間搵工，而且仲要同幾百人一齊競爭。其實，以iBanker這些天之驕子工作，幾百人一齊申請又唔出奇，雖然幾百人一齊申請，但不代表他們是冇工作做，當中應該有不少是想轉換一下工作環境，甚至騎牛搵馬亦大不乏人，不少新樓盤都大幅超額認購，唔通入飛買樓的人冇自己的自住單位？
iBanker如果揸住一大堆有錢客，根本不用搵工，而是工搵他們，現在搵工的iBanker都是冇客在手，希望新工可以帶給他們新的客戶。
其實，那些現在搵工的iBanker本來是有客的，但可惜為了自己得到更高收入，向客戶推銷一些高風險金融產品，最後那些金融產品大幅貶值，甚至「清零」，客戶損失慘重，試問又點會唔離開那些iBanker。手上冇客人代表冇價值，被投行放棄亦是很正常的，冇工做當然要搵工，到搵工時就會明白，手上冇客搵工是很艱難。
曾被call loan客戶一定離開原銀行
iBanker為了增加收入而做死自己個客，都算是情有可原，但不少銀行家為了執行銀行指令而向借貸比率合資格、準時還款的客戶call loan，最後客戶都要賣走部分資產才倖免於難，但自此之後，那些曾經被call loan的客戶在有機會下，一定會離開原有的銀行，銀行家手上的客戶愈來愈少，最後亦會被銀行放棄，變成失業大軍中的一員。如果銀行家據理力爭，向銀行甚至金管局反映，向抵押品足夠，而又準時還款的客戶call loan，即是自我毁滅，即使銀行堅持自己意思，但客戶仍然會與銀行家站在一起，在雨過天青之後，唔會咁容易離開銀行。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
