2024/03/15
湯文亮
政府「撤辣」後未夠半個月，已經賣了2000個新樓單位，二手樓成交亦唔錯，買家要在無樓睇之下出價，連拍賣場都非常熱鬧，在你爭我奪之下，拍賣物業被搶高三成，贊成「撤辣」的官員鬆一口氣，因為在「撤辣」之前，不少外資投行以及測量師話「撤辣」無效，樓價會繼續下跌。如果真係「撤辣」無效，政府唔知有乜辦法可以令樓市復蘇，樓市唔掂，地產商就唔會買地，以往仲可以話香港地產商唔買地，有內地地產商買，現在都無呢支歌仔唱，無人買地，政府財赤就無辦法解決，官員們唔頭痛都唔得。
保留辣招框架 起阻嚇作用
有人話，政府「撤辣」是無問題，但點解連SSD都撤，因為撤了SSD，炒家就會出動，話政府今次撤錯了。據我收到的小道消息，政府根本無打算「撤辣」，直至《財政預算案》最後階段才決定撤，已經無時間細想邊條辣招撤，邊條唔撤，於是全撤，但保留辣招框架，有必要時重推辣招。我覺得有多少多餘，以前都無辣招框架，政府一樣可以出招，但政府咁樣講有一個效果，市民可能擔心政府再出招而盡快買樓，無形中加速樓宇銷售及推高樓價，但我相信官員沒有這個意思，只是提醒大家唔好炒樓，樓價升得太快政府會再出招。
大多數人認為政府唔應該撤銷SSD，認為是方便炒家炒樓，最終推高樓價，但事實上撤銷SSD是高招，如果政府不是匆忙中撤招，可以說是有高人指點才會撤銷SSD。在「撤辣」之後，有不少大手新樓貨尾成交，那些買入新樓貨尾的人最終都會將貨尾出售，無形中加大未來供應量，對壓抑樓價有一定作用，就算地產商加價，都唔會加得太狠。事實上，有傳聞話地產商是唔希望政府撤銷SSD，令到買了新樓的人兩年內唔可以同地產商競爭，傳聞是真是假，真係無從稽考，但撤銷SSD的確是高招。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
