2024/03/14
湯文亮
有老友問我有冇從拍賣場買物業，我本來想話冇，但很多年前試過一次，當時樓市很旺，我貪玩走去拍賣，並以底價舉手買其中一個工廠單位，但唔知點解，竟然冇人承接，就知道自己中伏，唯有頂硬上買下那個工廠單位；好彩唔使幾耐，可以賣走那個單位，並且有不俗利潤。自此之後，唔敢再到拍賣場，說到底這不是我搵食的地方。
嚴格來說，拍賣只是一個流程，被拍賣的銀主盤，經拍賣後，如果冇人承接，財仔會以低過拍賣價出售那個物業，不足之數，就會向債仔繼續追討。不過財仔很識做，如果不足之數不是太多，是不會繼續追討，給雙方留條後路，咁樣做生意才可以長做長有。
理論上，除非樓市癲咗，否則，拍賣場上永遠都是冷冷清清，雖然有很多專家話「撤辣」無效，但事實上在「撤辣」後新樓貨尾去貨速度驚人，二手樓亦不遑多讓，但仍然未可以肯定樓市復蘇，如果連拍賣都旺，才可以肯定說樓市復蘇，因為在拍賣場的單位有不少是有瑕疵，甚至是凶宅，連那些單位都有人買，想唔承認樓市復蘇都唔得。
有人問點解拍賣價大多數低於市價，理論上在大家鬥搶之下，拍賣價應該愈搶愈高，老實說這的確是理論，而事實上是有一班人在拍賣場搵食，他們用圍標方法，令物業不會以高價拍賣，甚至合謀不出手，令物業不能以底價出售，圍標的人可以再壓價，但現在樓市火了，拍賣價被外人搶高兩三成，圍標的人散了，買又唔係，唔買又唔係。至於點解有人會在拍賣場上尋寶，其實很簡單，就是可出售的樓盤大量減少，不是被封盤就是大幅加價，只有拍賣場上的才是實盤，估計在未來一段時間，將會有大量物業被拍賣，因為財仔亦會趁機賣走手上銀主盤。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
