2018/09/12
杜鳳儀
上星期超強颱風「飛燕」襲日, 日本關西國際機場因停機坪和跑道嚴重水浸而關閉, 全部航班升降要暫停, 現時一般旅遊保險嘅保障範圍, 都包括因惡劣天氣造成嘅行程延誤,但承保金額設有上限和細則, 提提大家, 要留意保單有冇滯留時間設限, 一般飛機延誤達5小時才會獲賠. 而旅遊保險一般都設有賠償金額上限, 部份計劃更會就客戶滯留當地期間, 所花費開支分門別類, 如住宿、日用品、餐飲和交通費等, 訂明不同條款和賠償上限, 及必須憑單據實報實銷.
受航班延誤影響、留在香港仍未出發的客戶, 亦可因行程被迫取消, 向保險公司索償已付嘅機票同酒店費用. 不少朋友習慣在臨出發前才購買旅遊保險, 提醒大家要注意投保時間, 客戶响惡劣天氣發生後才投保, 將唔會獲得賠償.
俾d 貼士大家, 當所有機票、酒店已經訂好, 最好就第一時間購買旅遊保險, 除咗你無法控制天氣變化之外, 如果你上機前身體不適而醫生亦唔建議你上機的話, 你之前所花嘅費用都可以索償, 當然有上限, 一般保障額都有2-3萬不等, 仲包埋已經訂好嘅主題樂園、展覽、博物館、運動賽事、音樂表演嘅門票費用, 唔舒服去唔到雖然掃興, 但起碼可以退番d駛费, 都冇咁唔開心啦.
另外, 好似上星期飛燕咁, 起初航空公司都冇辦法知道幾時先可以恢復升降, 上面提到因為惡劣天氣令旅程延誤超過5小時後, 保險公司又會有賠償, 不過賠極都只係一、兩仟蚊, 所以如果遇上機場、碼頭或者火車站關閉導致延誤超過8小時, 你就可以用更改行程保障一項取代旅程延誤保障去索償, 彈性就大好多, 後者可以立即改用其他交通工具離開, 例如今次情況, 可由大阪去名古屋或者其他機場再轉機返香港, 額外嘅交通費用就可以索償, 唔駛响機場呆等兼同人迫, 保障範圍一般都由1萬至2萬不等, 視乎閣下幫襯邊間寶號.
最後, 記得好好保存所有嘅登機證或者火車票, 因為提出索償時, 除咗要有航空公司嘅航班延誤證明之外, 登機證或者火車票等資料都需要提供俾保險公司做理賠, 今次就講住咁多先, 下周會繼續講餘下嘅保障及索償小貼士, 記得繼續捧場喔.
（文章內容純屬作家個人意見，並不代表本網頁立場）
贊助
