2024/03/12
湯文亮
有年輕朋友幾個月前準備買樓，當時我話趁物業代理得閒，業主又願意開門畀人睇樓，睇多幾間，萬一財爺在《預算案》中宣布「減辣」，可以立刻做決定，如果等「撤辣」之後才去睇樓，睇得嚟都蚊瞓，年輕朋友話唔想浪費時間，一定要等「撤辣」之後才去睇樓。
年輕朋友唔明白物業投資者「快狠準」的意思，尤其是個「準」，以為買了樓之後樓價上升，或者賣了樓之後樓價下跌就是準，眼光好準的意思，其實只是其中一個解釋，「準」字另一個意思就是準備工夫要做足，連樓都唔去睇，又點可以做到出價快，決定狠。
「撤辣」之後年輕朋友問我有冇相熟代理可以帶佢去睇樓，他認識的物業代理全部都唔得閒，就算得閒都話業主唔肯開門，只能接受業主的要價或者還一個價畀業主考慮，買成千萬元的住宅單位唔係買棵菜，冇樓睇點敢落注，但佢唔買，有其他人買，唔通其他人買樓唔使睇樓，諗極都唔明。
年輕人唔知道，買樓的人當然要睇樓，不過並不是今日睇，而是樓市淡靜的時候去睇，唔做好準備工作，有筍盤靚樓都唔識得執。
筍盤是留給有準備的人
準備工作除了睇樓之外，亦要睇吓自己荷包、銀行取態，現在銀行按揭批核甚嚴，雖然話免除了2%壓力測試，但銀行要求買家有足夠的收入，如果唔及格，按揭成數可能會較少，有人話唔怕，如果樓價上升，即使銀行唔批，由於政府撤銷了SSD，可以將買入的單位「摩走」，千祈唔好咁樣諗，銀行已經預先公布唔做「摩貨」生意，即是冇下手買家，如果上唔到會就唯有撻訂，到時就會眼白白睇住樓價上升，而自己就要撻訂，到時真係喊都無謂，唯有怨自己唔做好準備工作，筍盤是留給有準備的人。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
