2024/03/06
湯文亮
在財爺「撤辣」之後，短短7日已經賣走700個新樓單位，有人認為樓市已經回復正常，樓價亦會節節上升，甚至可以在一兩年內再創高峰。老實說，我是在「撤辣」之前，極少睇好樓市的人之一，甚至是唯一。但我認為樓市要回復健康發展，取決於地產商如何推銷新樓，如果提價太急，市場不能接受，成交量下跌，就會浪費財爺「撤辣」的一番好意，再要提高成交量，唯有大幅減價，地產商可能因加得減。
財爺「撤辣」之後7日，很奇怪地產商沒有打鐵趁熱，以優惠價推出新樓盤，只得一個新樓盤開售138個單位，雖然賣個滿堂紅，但絕對不能作為指標，以為樓市復蘇了。其實，以這個新樓盤售價，就算財爺唔「撤辣」仍然可以賣得八八九九，不能將新樓盤熱賣歸功於財爺「撤辣」，其實最重要的是售價。
優惠價推盤 藉大量成交「築底」
地產代理行業有一句術語，叫「築底」，就是在某一個價位有大量成交，以後要跌都唔係咁容易。雖然「撤辣」之後賣了700個一手單位，但相比5萬個貨尾單位及即將開售單位仍然是少數，如果地產商收回貨尾單位的優惠，以及提價開售新樓盤，令到準買家不甘心在短期內要畀多咁多錢而拒絕買樓，成交量不足，代表「築底」尚未成功，樓市有再下跌的可能。所以，要樓市健康發展，首先就要「築底」，地產商應該用較優惠價推出新樓盤，令到每次都可以賣個滿堂紅，如果在6月底之前賣到2萬個單位，可以說是「築底」成功，地產商以後可以慢慢加價，咁樣做才可以令樓市健康發展。不過「澳牛」都大幅加價，地產商見到咁好賣，又點會唔加價，如果唔加價又可以「一Q清袋」，一定會畀老闆鬧，大多數老闆唔鍾意「一Q清袋」，寧願加價賣唔郁，樓市要健康發展唔係咁容易。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
