2024/02/16
湯文亮
有人話，今次香港樓市大鑊了，農曆新年期間，十大屋苑竟然零成交，其實有什麼好大驚小怪，在農曆新年期間，有超過100萬港人離開香港，當中包括業主、買家，甚至物業代理，一單物業成交就需要這三類人，唔齊腳，生意很難做得成。况且物業代理知道，唔使幾耐，就會有大量新樓盤供應，不但佣高糧準，又唔需要仔細介紹，一切有地產商職員代勞，代理又點會在農曆新年期間浪費精力，介紹那些二手樓盤，不如養精蓄銳，留番啲精力推銷地產商新樓盤好過。
無論業主或者買家，他們都知道在2月底，「財爺」宣讀《財政預算案》時，很大機會將所有打擊樓市「辣招」撤銷，甚至將正常印花稅減半，刺激市民買樓意欲。在這情况下，無論是賣家或者買家，甚至連地產商都不會在這個時候買/賣樓，連地產商都不推出新樓盤，一般打算買樓的人又點會現在買樓，遲兩三個星期有可能慳番一百幾十萬。
憧憬月尾財爺「撤辣」 無人會現在買賣樓
業主又點解現在唔賣樓？因為業主知道，政府如果「撤辣」，買家有機會慳番高達15％印花稅，出價會勇好多。如果現在賣樓，萬一政府在2月底「撤辣」，不但成交量急升，成交價亦會上升，正所謂「執輸行頭，慘過敗家」，現在無論買樓抑或賣樓，比行頭仲要企前一步，除非迫不得已，否則點會現在買/賣樓。
有人話，物業代理阿頭，對前景很灰，那些人唔明白，物業代理是靠成交量維持生計，如果零成交，淨係人工燈油火蠟都輸死。不過，急也急不來，一定要等2月底《財政預算案》之後，如果政府唔「撤辣」，樓市會繼續下跌，成交量亦會維持在低水平，冇人買新樓，地產商就唔會買地，政府就要考慮開徵新稅項及推行緊縮政策，到時香港真正冇運行。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
