2024/02/14
湯文亮
在農曆新年期間，有不少國內老友嚟香港拜年，順便睇吓學校，睇吓樓，不少老友都打算將小朋友送嚟香港讀中學，日後去外國甚至回國升學都比較方便，買一層樓亦順理成章，不過，一切都等2月28日之後，因為當日是財爺公布《財政預算案》，有很大機會撤銷「辣招」，即是非香港人買樓將不用付15％特別印花稅。
大家又千祈唔好以為如果財爺唔「撤辣」，內地人是不會買樓，我認為是有影響，但不至於不會買樓，因為大家都估計，無論是否「撤辣」，政府決定之後，起碼有三五年不會改變，如果「撤辣」，買樓的內地人就會多些，唔撤就會少一些，不過唔「撤辣」，樓價繼續下跌，地產商又唔買地，政府很難解決巨額財赤問題，當然，即使「撤辣」，樓市亦不會立刻掉頭升，只是會多了人睇樓買樓，繼續下跌的機會就會減少，總之，「撤辣」就好似如箭在弦，不得不發。
即使政府撤辣，甚至將正常買樓印花稅減半，但如果銀行唔借錢畀人買樓，「撤辣」都是徒勞無功，去年樓價下跌其中一個原因，就是很難問銀行借錢買樓，而銀行反而向按揭借貸比率不足五成的客戶追收差額，令到供應增加，需求減少，樓價就點會唔跌，好彩最近銀行估價稍為回升，銀行不再以估價下跌理由向客戶追收差額，業主可以鬆一口氣，樓市亦會鬆一口氣。
其實除了內地人之外，亦有不少香港人等《財政預算案》後才買樓，因為如果唔「撤辣」，他們仍然可以慢慢揀，慢慢鋤價，如果「撤辣」，就會加快買樓腳步，否則，有機會唔夠現在要畀特別印花稅的人爭。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
