《恒債吸引 買恒債的人仲吸引》

債息不高令人失去警覺性

他們的答案我明白，從報紙上所見，大量買恒債的人不單止粒粒皆星，而且粒粒都是巨星，他們的吸引力根本無法抵擋，他們買恒債，其他人點解唔跟住買，除非是冇能力。在過去，我亦不時被人游說買恒債，他們並不是說恒債點好點好，而是話邊個邊個有錢佬都買，點解我唔買，有金都唔識得去執。我話我當然識得執金，不過執金不用本錢，買恒債要資金，我冇錢又點可以買恒債？理論上冇錢是推卻別人的最佳藉口。

不過，金融專才的能力又絕非大家能夠想像得到，有專才話，冇錢唔緊要，可以將手上物業做按揭，如果按揭成數超過金管局規定，可以用恒債抵押，只需要付2厘利息支出，而回報收入有6厘至8厘，何樂而不為？老實說，當時我亦打算買恒債，但可能我表現得唔夠積極，銀碼又唔係咁大，專才才冇理我，而且擔心自己又變成專才口中的邊個邊個，所以才打消買債念頭。今日才夠膽講吓恒債，否則，我一樣會保持緘默。