《取笑老闆忌過火》

很多人唔明白，老闆容許伙記在年夜飯取笑佢，因為心知道伙記是有分寸，在取笑佢之餘又會讚吓佢，而且是讚多過彈，咁樣做，老闆想嬲都唔得，但很多時上台表演的伙記得意忘形，本來準備好讚老闆的說話一句都唔講，取笑的說話就過了火位，結果唔使我講，大家都應該估得到，就算幾好風度老闆都會唔開心。

有很多公司的年夜飯都會搵一些藝人撐場，例如搵阿Bob做司儀，大家估下阿Bob會不會取笑公司老闆？當然唔會，因為阿Bob知道，是老闆出糧畀佢，既然是一次過的費用，那些演藝人士都唔敢取笑請他們表演的人，點解長年收人工伙記又會取笑老闆咁大膽，不過或者唔係大膽，而係蠢。

但有人唔明白，既然演藝界人士咁識做，但點解在一次頒獎典禮取笑香港政府，現在有可能被取消資助，其實都是一樣。資助對於演藝界人士來說，如同打一份「長工」，政府就是老闆，取笑老闆是很正常，但如果資助是一次過，我相信唔會出現這個情况。其實，玩吓政府唔係唔可以，不過在玩之餘亦要讚吓政府，保吓底，咁就萬無一失。