《賣了樓唔係咁易買得返》

很多人唔明白，銀行都要做生意，按揭生意是最安全，問銀行借錢買樓有什麼困難，在正常情况下是沒有錯，但銀行並不是一年365日都會借錢畀人買樓。一般來說，在年初比較積極，導致樓市會出現「小陽春」，但今年比較困難，唔好講第一季，甚至全年都很難問銀行借錢買樓。所以，即使賣了樓的人見到一個筍盤，買下來就是一個贏家，但最後會發覺借唔到錢，變成「蜑家雞見水」，有得睇冇得飲。

有人話，銀行不會永遠唔做生意，總有一日不但會借錢畀人買樓，仲有回贈畀借錢的人，我相信這個日子一定會到來，而且不用等太久。不過，到那時候，一定會有很多準備買樓的人一齊買樓，銀行方面沒有問題，但業主見到多人問價買樓，立刻會吊起不賣，在需求大增、供應減少之下，樓價很容易急升。那些賣了樓以為可以大賺的人，到最後就算可以買返樓，都會發覺「得個桔」，如果唔買，當樓價升超過賣出價，那些人就會變成輸家，他們會覺得非常唔抵。在樓價下跌時唔係唔想買樓，只是搵唔到銀行做按揭，所以，如果唔係有很多錢可以隨時買返樓，都唔好咁輕易賣走自住單位，因為要買返是很困難。