《銀行「冚旗」 很難借錢買樓》

在的士上，年輕朋友話打算買樓，而且已經搵到合適單位，價錢亦傾妥，申請按揭雖然很困難，但始終都獲得銀行批核。年輕朋友擔心，以他的條件都咁難申請按揭，由此可見，有資格買樓的人不多，在承接力不足之下，樓價不但不會上升，甚至會繼續下跌，現在買樓，豈不是「捉蟲」？他心大心細，所以想聽吓我的意見。

等銀行放寬按揭才買樓也不遲

老實說，我最鍾意叫人買樓，大前提當然是他們有需要而又負擔得起，不過我還未開口，的士司機已經搶先回答，佢話現在銀行好似的士一樣，「冚旗」揀客，如果銀行已經批准，就好似截到一架冇「冚旗」的士，點解唔買樓？星期五晚在中環能夠截到冇「冚旗」的士，一定不要猶豫，上咗的士先算。

真想不到，原來高手在民間，銀行現在的確「冚旗」揀客，今年都很難借錢買樓，如果銀行肯借，千祈唔好唔借，到明年銀行比較容易借錢買樓，樓價就會上升。當然，如果沒有需要就千祈唔好買住，等到銀行放寬按揭才買亦不會太遲，買貴少少當機會成本。

年輕朋友唔明白，點解講銀行現在是「冚旗」揀客，其實，銀行不是不借錢，而是希望貸款人除了畀多一些首期之外，更加畀多一些利息，令到銀行所貸出去款項，不但更加安全，收益更好。買賣是一個願打，一個願捱，當的士生意唔好，司機就會話照表八折，當借錢買樓的人減少，銀行就會以現金回贈來吸引打算買樓的人，這個世界是很公平的。