2018/09/05
杜鳳儀
筆者上星期响新聞報導發現咗超級租霸, 竟然搞到業主晩晚要食安眠藥, 經典行為, 慘不忍睹, 有見及此, 想分享一下, 免得大家中招.
業主A, 元朗村屋, 據地產代理話租客係老闆, 業主不虞有詐, 今年2月初起租, 3月已經開始欠租, 最後搞到8月要揾埋記者同執達吏上門收樓, 不少傢私被破壞, 牆壁被狗抓爛.
業主B, 涉事單位响大圍金獅花園, 入住4年, 拖欠租金之後搬走, 留低雜物垃圾堆逾一米高, 單位猶如垃圾房, 全屋裝修‘ 爛溶溶’, 千隻曱甴到處走, 屋內亦充斥惡臭. 業主要自己揾搬運工人搬足一日至清理好現場, 之後仲要揾清潔工人善後.
業主C, 中西區私樓, 懷疑租客同業主鬥氣, 搬走時竟然將單位每塊地磚都放咗 ‘ 屎’.
實在太過份!! 如果自己嘅出租單位被租客搞成咁, 租又收唔到, 仲唔係陪了夫人又折兵! 咁點自保呀？ 專家出場喇, 根據香港業主會會長講, 出租時要注意嘅三大事項, 首要了解租客背景, 唔好地產代理講你就信, 職業無分貴賤, 租客份工年資越長就比較穩陣, 萬一欠租, 你打去佢間公司話佢欠租, 正常人都唔想. 其次就係儘量唔好租俾 ‘ 有限公司’, 一蚊雞嘅註冊資本多的是, 到時你清佢盤都冇用, 再嚟, 千祈唔好上門 ‘㩒’ 租客門鐘, 原來有業主試過上門追租, 初則口角, 繼而動武, 業主被租客用菜刀斬, 冇咗手指公, 個租客被判監兩年咋. 你話邊個唔抵？最後一招, 就係唔好擅自扔咗租客嘅傢私雜物, 有需要最好向法庭申請棄置令, 原來有租客試過告業主扔咗佢幅名畫, 仲出示單據, 價值2百萬, 告入咗高院, 要業主賠償2百萬損失.
睇完報導之後, 筆者都 ‘O’嘴, 原來之前遇過嘅個案係好濕碎, 所謂一山還有一山高, 各位親愛嘅讀者, 除咗以上三招之外, 記得要買業主保險看門囗, 免得遇上租霸要晩晚食安眠藥至瞓得著啦.
（文章內容純屬作家個人意見，並不代表本網頁立場）
贊助
