《不宜睇淡今年樓市》

2023年太多人睇錯樓市，包括小弟在內，主要原因是有太多未可預料因素，首先是美國暴力加息，好彩有美國地區銀行「執笠」，否則美聯儲局都唔會收手，對樓市不利影響更大。今年是美國總統選舉年，按慣例不但不會加息，甚至會快速減息，這是現任總統的「特權」，拜登唔會唔用，否則他想連任都幾難。

美或減息港投資移民重啟正面

香港業主有一個夢想，就是在解封之後，政府會撤銷「辣招」。點知大家都估錯晒，政府受到民粹意見影響，不但不敢「撤辣」，甚至連放寬內地人買樓的專才稅也不敢，政府做法很難令人理解，一方面搶人才，另一方面要求專才繳付30％印花稅，如此口是心非政策，邊度會有專才嚟香港。到第四季政府才半「撤辣」，先免後徵專才印花稅，同時重新啓動「投資移民」計劃，有購買能力的需求大幅增加，對樓市有正面影響。

令樓市下跌另一個主要因素，就是銀行整年不但不積極放貸，而且向財政緊絀的按揭客戶追數，令到有不少業主要賣樓還貸。銀行追數對樓市一定有負面影響，但好彩影響亦不大，大致上已經穩定下來，銀行始終都要做生意，唔通今年仲唔借錢畀人買樓，當銀行放貸，利息下降，內地專才或者「投資移民」在香港買樓，樓價點會唔升，最後一句是不宜睇淡今年樓市。