2023/12/20
湯文亮
我初出道時，以「昨夜星辰昨夜風」心態去飲花酒，即是同小姐當晚可以卿卿我我，但點都唔會上身，因為我見過不少朋友，最初時話與那些小姐只是逢場作戲，不會認真，但結果那些小姐做了二奶、三奶，最後都是家嘈屋閉，悲劇收場，歸根究柢都是不了解什麼是逢場作戲，逢場作戲的意思就是唔好上身。
在過去幾年，有不少已經有自住單位的人入票新樓盤，如果有人問他們就會話只是逢場作戲而入票，唔會真係買，况且超額認購幾十倍，唔係咁輕易可以買到樓。又唔知點解，那些逢場作戲的人又真係會抽到，當抽到之後他們亦改變主意，認為咁難都可以抽到，千祈唔好將好運趕走，况且又唔需要立刻畀晒錢，一成首期是冇問題，於是無端端買了第二個單位。
第二個單位較難賣走
當接近入伙時就會發覺上會很困難，一定要用地產商的「呼吸Plan」，利息稍為高一點都不是問題，但是很難賣走，因為地產商不會為二手買家提供「呼吸Plan」，最後，那些本來無憂無慮的業主，因為逢場作戲而搞到自己財困，甚至要將自住單位賣走。不過又唔能夠怪人，是他們自己不了解逢場作戲的意思。
有人話，第一個單位是「老婆」，一定要有，而第二個單位是逢場作戲，不用太認真；但我認為第二個單位是「小妾」，最好的結果當然是享齊人之福，擁有兩個單位，萬一不幸，就連大婆都冇埋，即是因為買了第二個單位而被迫出售自住單位，因為第二個單位唔係咁容易賣得走兼要付特別印花稅，所以，買第二個單位不可以話逢場作戲，睇吓樓就真係逢場作戲。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
