《新股上市對股市有利》

有一件事我可以肯定，在歐冠昇離開之後IPO會大幅增加，今年新上市的公司唔夠100家，明年不但超過，甚至可以去到150家，理由是港交所亦不能太清高，既然其他地方股市都降低門檻，點解香港仍然咁「離地」？那些負責上市的專業人士，如果在香港搵唔到食，就會蟬過別枝，所以，港交所一定會降低新上市公司門檻，危險性當然會增加，但玩得股票的人，又點會唔知道其危險性，輸咗唔會賴港交所。

港交所或會降低新上市公司門檻

其實，愈多新股上市對股市愈有利，那些打算買新股的人發覺香港股市遍地黃金，不少股票資產淨值大幅高於股票市值，派息又高又穩定，睇唔到短期內會發盈警。至於打算申請的新股，不但要畀溢價，派息是未知數，就算有派息回報都唔會好，上市之後發盈警是指定動作，申請新股不如在股市買那些潛質浮晒上水面的股票，多人買股票，不但成交量上升，股價亦會上升，成個股票市場生晒。

至於那些新股，大家又不用擔心冇人買，大幅超額認購未必會出現，但認購不足亦不會發生，况且，那些打算上市公司的負責人亦不在乎有幾多人認購，只在乎是否可以上市，因為在上市之後，隻殼就有機會可以賣走，所得資金比上市集資所得多得多，賣唔賣得到就是後話，起碼在心裏都非常舒服，如果連那些新上市公司的股票都有人買，那些資產淨值非常高的股票又點會冇人買，多人買股票，股市自然興旺。