2023/11/30
湯文亮
近日樓價不斷下跌，冇樓的人非常開心，這是香港人特性，有人說是「魚蛋論」，不是你有我有，而是我冇你冇，冇樓的人不是希望政府幫助他們買樓，而是希望政府出招令大家更難買樓。冇人買樓，政府又不斷推出土地拍賣，在供應增加，樓價自然下跌，如果連土地都冇人買，簡直是冇樓人士上上籤，樓價一定會跌，買了樓的人就慘了，冇樓分析員會大大聲講，早已提醒大家唔好買樓，唔信專家的說話，只相信持有多個物業的業主講嘢，想唔輸死都唔得。不過，他們冇講，如果唔買樓，將啲錢買股票、債券、虛幣，可能輸得仲多。
有人問點解樓價會跌，除了部分業主因投資失利，或者個人消費太高而被迫賣樓，令到樓宇供應增加，同時「辣招」將購買力鎖死，在供大於求的情况下，樓價下跌是正常的，但最大原因是政府在樓市下跌之際，仍然推出大量土地拍賣，除了有部分以低價成交之外，竟然連續6次流標，最後1次竟然零入標，地產商連執雞都費事，連土地都冇人吼，試問一般市民又點夠膽買樓。
如果政府了解病情，對症下藥，就是暫停賣地，直至市場有肯定需求，我夠膽講，此招一出，樓市就算唔升，都唔會跌。不過，政府擔心有很多睇淡樓市的人反對，不用擔心，一定會有很多，不過那些聲音來自海外，大多數是外移的港人，他們當然唔希望香港好過，香港政府相信他們就死得啦。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
