《既然冇人買 何必推出土地》

有時我非常佩服新加坡政府，見到外資因為印花稅太高唔買樓，而又唔想撤銷30％印花稅，在未來一段日子將會很少成交，索性將印花稅加至60%，令評級機構認為新加坡樓市暢旺，不但唔會降低，甚至提升新加坡的評級。

應停推土地 直至發展商要求

香港官員不但「死牛一面頸」，而且「又要馬兒好，又要馬兒不吃草」，一方面打擊樓市，另一方面推出土地拍賣，以為地產商一定要買，5次流標都唔改變土地銷售方法，到第6次流標簡直是侮辱，任何政府都應該受不了，除非官員以平常心面對。

我相信政府連少少資料搜集都冇做，否則應該知道香港有2萬個新樓單位庫存，短期內仲有幾萬個嚟緊，地產商當務之急是去庫存而非增加土地儲備，除非土地價格相當廉宜，但地產商亦唔想低價買地，咁樣對新樓售價有極之不利影響。政府除了「撤辣」之外，更加要暫停推售土地，而且在恢復發售土地的時候，一定要改變方法，招標一定不行，有底價公開拍賣是可行方法。如果政府唔理會業界意見，強行推出土地，再一次零入標，對政府威信是一次嚴厲打擊，就算是平常心都會受傷害，如果唔信，政府可以試多次。