財爺陳茂波話香港今年的GDP增長率預測至少有3%，稍低於預期，我認為財爺本來話以平常心面對，但點知發展局長講先一步，局長話以平常心面對今年有5幅土地流標，立刻被人批評到暈。因為平常心代表公務員心態，即是你有你死，佢有佢返屋企，土地是否流標局長都是收咁多人工，點解唔係以平常心面對？既然有5次流標，政府應該改變一下出售土地方法，招標賣唔出就改為有底價拍賣，未必一定可以賣得出，但自古成功在嘗試。
有人問疫後GDP增長只得3%是否很低，老實說，不單止低，而且低無可低，好彩香港仲有老本，否則就要發債、加稅，甚至要開徵銷售稅。至於點解GDP增長率咁低？簡單來說，是由於政府集中打擊炒樓活動，置民生經濟於不顧，現在樓價雖然比高峰時下跌了17%，但由於樓價下跌，令到不少投資者冇多餘錢買股票，甚至要賣手上股票來應付銀行call loan，結果恒指下跌差不多一半，部分藍籌股下跌六成，股票市值比資產淨值大幅折讓，原來「賤物鬥窮人」的日子已經悄悄來到。
不少港人羨慕星樓價高企
政府打擊樓市最後傷及香港元氣，「辣招」令買樓的人減少，樓價下跌，銀行收緊信貸，做緊生意的業主根本沒有多餘的錢去拓展生意，能夠保持已經算唔錯，但不排除有一些業主因銀行收縮信貸而將結束生意，做生意的人減少，經濟又怎會活起來？
本來，政府官員應該改變一下管治策略，趁復蘇的時候撤走早已不合時宜的「辣招」，而且仲要徹底一些，有幾多撤幾多，務求使樓市成交量增加。根據角動量守恆理論，有足夠成交量的樓價才是真正樓價，只要有足夠成交量，無論樓價升跌，市場都會活起來，才可以令香港慢慢復元，否則，不但夜繽紛搞唔起，仲令到不少市民為了慳錢而要山長水遠去深圳買平價貨。老實說，如果搵到錢又點需要慳，樓價高企不但不是洪水猛獸，反而是動力泉源，現在已經有不少香港人羨慕新加坡樓價高企，非常奇怪。
