《如何搞活夜繽紛》

星期日我去了中環海濱「酒繽紛」，用200元租了一隻杯，買了8杯酒，有檔口老闆同我講，根本唔使買酒票，參加的檔主並不是打算做零售生意，而是推廣自己品牌，根本是任飲唔嬲。如果以做零售生意心態，差不多每一個檔口都要蝕錢，但如果以推廣心態，大多數檔口都賺到盤滿缽滿。

雖然政府非常戮力推廣，但市民對灣仔海濱的「夜繽紛」評價不高，如果唔轉型，估計很快就會落幕。有人問點解「酒繽紛」成功，而「夜繽紛」慘淡？簡單講一句，就是定位不同，「酒繽紛」是推廣，「夜繽紛」是零售，參與「夜繽紛」的是零售商，要計成本，左加右加之後，成本就會很高，所賣產品售價亦要很高，20元4粒燒賣就會被人當笑話。其實檔主可能仍然要蝕錢，但如果檔主與醬油公司合作，買4粒燒賣可以得到一支小號醬酒，我相信冇人會話貴，而醬酒公司又藉此推廣，形成一個雙贏局面，檔主賺利，醬油公司賺名，贏輸只看定位。

應重推廣多於零售

其實不止「酒繽紛」，所有美食展覽、工展會等，都比「夜繽紛」搞得好，主要原因是所有展覽的定位都是推廣而非零售，其實「夜繽紛」亦要以推廣作為目標，參加檔口食物飲品售價就算貴過市面，亦要送出一些特別贈品，務求令幫襯的人覺得非常抵。即使如此，亦不能讓檔口攤主長期佔用攤位，要有一個期限，不應超過兩星期，不斷換檔口才可以吸引市民去完再去，否則就一次起，兩次止。

政府官員可能唔知道，一個做推廣的舖位價值遠比做零售高，所以，如果政府能夠將「夜繽紛」成功轉型至推廣形式，就已經是贏了。千祈唔好再以廟街、「女人街」作為「夜繽紛」的藍圖，因為「夜繽紛」場地不具備廟街、「女人街」的條件，一個沒有人流場地，如果以零售作為定位，一定會失敗收場。