許多人見到香港有不少有錢人都有不少物業，以為他們是做地產行業，反而唔知道他們的本業是什麼，由於有太多類似例子，不少人認為香港的有錢人淨係識做地產，其實這是一個美麗的誤會，如果那些有錢人不是有投資其他行業，很容易會被地產淘汰。如果有人問我好唔好投資地產，我一定話唔好，如果一定要投資，他日遇到困難就唔好賴我。
如果閣下是收租佬，有租客做得唔好冇租交，租客不會自我檢討，只是話租金太貴，如果業主唔收租，他其實是有錢賺。反過來說，如果租客做得好，不但賺錢，亦有名氣，千祈唔好奢望租客會交多啲租，他們反而會話有其他業主以低於市價的租金吸引他們，如果業主唔減租，他們唯有搬走。無論租客做得好唔好，最終都是要求業主減租，收租佬點會好做，仲話係「上門襯家」生意，其實低聲下氣到唔恨。
不能任意加租 隨時被銀行追差額
我從未聽過有業主在簽了租約之後，可以任意加租，但如果物業按了畀銀行，銀行有權隨時要求補差額，理由是物業估價降低，如果客戶唔補差額，銀行隨時會有損失，唔好以為銀行借了樓價八成、九成畀業主，而大多數按揭貸款金額是少於樓價五成。所以，有樓收租的業主非常擔心隨時被銀行追差額，既然成日都心驚膽跳，點解仲要買樓收租，不如做定存，不但回報高過收租很多，而且仲會被銀行作上賓看待，買樓收租真係「有自唔在，攞苦嚟辛」。
租客冇錢交租，業主要經過「繁文縟節」才可以收返個單位，我可以肯定講業主一定有損失，反而銀行追數收樓，在變賣之後不但沒有損失，仲可以向客戶收取手續費，而收樓費用例如律師費等，一律要客戶負責，咁嘅情况，點會有人買樓收租？令到出租單位減少，租金上升，唔好以為業主會被租到樓的人讚，他們會話業主無良，樓價下跌而租金仍然上升，做業主做到變無良人士，嚇怕了很多打算買樓收租的人。不過，如果冇人買樓收租，業主無論在回報及尊嚴上都會提升，租客都唔敢得罪業主。
