《猶抱琵琶半遮面》

上周去浸大一個晚宴，其間有同學表演彈琵琶，本來大家對同學的表演沒有多大期望，老實說又不會太差，今次那名同學的表演可以用驚艷來形容，在她表演期間，全場一片寂靜，一個字：「正」。

同枱有人問我，大家講「減辣」已經講了很多年，今次《施政報告》會不會對樓市「減辣」，如果減又點樣減，全撤抑或唔撤。老實說，要政府全撤是冇可能，但唔撤又唔敢，既然大家已經等了咁耐，情况好似「猶抱琵琶半遮面」，我相信是半撤，所有辣招都半撤，不但對得住天地良心，而且任何一方都不會話政府偏幫其他的持份者，正是「不患寡，只患不均」。

有人話半撤不如唔撤，唔湯唔水，我覺得又唔能夠咁講，雖然是半撤，但我已經覺得很大膽。老實說，就算我做特首都唔夠膽全撤，因為全撤之後樓價必升，如果升得太急，就會受到指摘，半撤是可行的，而且雖然話半撤，其實是多過半撤，以港人買第二單位為例，以往是要繳付15%印花稅，現在只需要付7.5％；其實，正確是以往要付10.75％（15%減4.25%）印花稅，現在只需要付3.25％（7.5%減4.25%）印花稅，大約撤了70%，算係咁啦，不能夠太過苛求。

《施政報告》對樓市最關鍵是專才從以往的「先徵後退」，繼而變成「先免後徵」，這個做法才是合情合理，香港既然要搶人才，但又要專才畀30％印花稅，講出嚟都畀人笑，估計在《施政報告》後，睇淡樓市的人要重新思考。