人身意外

同事B知道筆者响呢個平台上寫專欄分享工作經歷, 佢問呢個專欄係咪一定要寫關於同地產有關嘅題材？會唔會考慮寫下普羅大眾都有關嘅風險管理？可以令多d讀者了解一下自身嘅保障. 順應民意, 今期就先分享同所有人都有關嘅人身意外保障. 首先, 人身意外基本上同年齡冇太大直接關係, 因為意外風險人人平等, 當然, 如果太大年紀相應會提升, 例如: 老人家 都容易跌倒啦, 出意外嘅機率亦相對較大. 而响保險公司角度, 風險同保費釐定一般都係根據職業嘅危險性區分, 簡單講分類就由坐响辦公室做文職嘅人風險最低, 如事者, 須體力勞動、要使用重型機械工作甚至如持械嘅紀律部隊就係危險性最高級別, 大部分嘅保險公司都劃分為3-4類不等. 至於保障範圍, 普遍都係由恐佈主義襲擊、由意外引致嘅死亡、永久性傷殘、醫療費用以及暫時喪失工作能力等. 另外, 全球保障, 即係話無論身在何方, 只是你發生意外, 導致到以上情況, 都受保障. 咁有d人會去玩比較高危嘅運動或者活動, 例如: 滑雪、熱氣球飛行、攀山/攀石、騎馬/電單車、滑浪、水肺潛水(不深於45米)、降傘、高山遠足、馬拉松等等.....通通都保. 至於筆者處理得最多嘅理賠就係每個月總會有嘅意外醫療費用, 何解？因為最容易發生囉, 天雨路滑跌倒、追巴士拗柴、打波踢足球扭傷甚至乎做家務都會整親而會用到嘅跌打、針灸, 物理治療, 仲有小朋友紥紥跳撞到縫針、打石膏等都經常會响周圍發生. 咁嚴重d就唔駛描述太多喇, 大家都應該想像到最常見嘅, 三日唔埋都會有嘅交通意外, 不過講到交通意外, 如果嚴重到足以永久傷殘, 真係唔係講笑, 身體損傷需要到龐大嘅醫療費用, 另外可能係醫生建議購買醫療器材、家居設施(加設扶手或者改裝浴室)嘅安裝費用, 又或者參加體能鍛練療程等, 真係難以估計嘅財務負擔. 所以, 筆者極力建議大家一定要做好呢個風險管理, 其實保費相當平, 講緊一、兩佰蚊一個月就買到一個週全保障. 聰明嘅人應該懂得將可能承受唔到咁大嘅財務負擔轉嫁俾保險公司. 正所謂, 意外意外.....意料之外嘛.