Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
二月 21, 2024 星期三 間有陽光 22° 92%

《投資地產 應小注怡情》

 
     
2023/10/13 湯文亮
近日除了內房之外,香港有部分物業投資者的資金亦比較緊絀,要出售手上一些優質物業,有口痕友話好彩我唔識交際應酬,唔識同銀行打交道,借唔到錢,所以今日才唔需要賣樓,我真係被那些人「吹脹」。本來是一件好事,被人講到變成壞事,今日能逃過一劫,只不過是我不懂得交際應酬,而不是我的財務管理得好;不過唔開心又怎樣,把口在人哋度,他們想講乜都得。

我話我從澳門過來,嚴格來說是賭仔一名,知道小注怡情這個道理,投資地產同賭錢都是一樣,亦應該小注怡情。我小時候見到何鴻燊,於是話我老豆個名都有個燊字,有冇嘢可以教下世侄。何鴻燊話,他已經將最好的策略貼在賭場,小賭可以怡情,做地產亦應該小賭怡情,雖然大家都叫何鴻燊做「賭王」,其實佢做地產相當犀利,否則就唔會講小賭怡情。

借得少最關鍵
當時我不明白投資地產亦可以小注怡情,我以為小買小賣就是小注。何鴻燊話錯,小注的意思是借得少,每一個物業的借貸少於五成,基本上是小注,就算樓價下跌兩成都不用四出撲水,更加不用賣樓還貸,但如果借得多成數,例如借八九成,就算樓價下跌一成,都有可能被銀主收樓,所以投資地產是否可以怡情,借得多借得少是最關鍵。

不過,講就講小注怡情,做就很難做到,不知幾多人去澳門賭錢最初都是小注怡情,最後都變成大賭亂性,投資物業也是一樣,一般人以為樓市上升就會借到盡,其實並不是,投資者與賭仔都是一樣,贏咗就會縮,不但唔敢買,甚至因為有錢賺而將手上優質物業出售,佢哋仲會話有糊唔食、罪大惡極。當樓價下跌,投資者見到市場上不時有筍盤出現,真係唔買都要睇吓,最後依然「落搭」,樓市調頭回升當然冇問題,但很多時都會繼續下跌,令到當時買了樓的人借貸比率上升,最後要賣樓還貸。如果他們保持小注怡情,即使有筍盤都唔買,就算買都唔會借得太多,以後就唔會畀人逼賣樓,所以,小注怡情是很重要的。

(本網發表的文章若提出批評,旨在指出相關制度、政策或措施存在錯誤或缺點,目的是促使矯正或消除這些錯誤或缺點,循合法途徑予以改善,絕無意圖煽動他人對政府或其他社群產生憎恨、不滿或敵意)
(文章內容純屬作家個人意見,並不代表本網頁立場)
贊助