《外資離港後回歸有因》

近日有很多外國舊租客回流，我當然非常歡迎，明白當日他們點解要離開，但就唔明白點解今日回流，想唔到哈馬斯突襲以色列，竟然將我的謎團解開。有老友話兩者風馬牛不相及，話我作得就作，老友講得冇錯，否則寫文章的人點會被人叫做作家，當中甚至有人可以攞諾貝爾獎。

閒話少說，在去年7月，美國維持對香港發出「不要前往」的第4級別旅遊警告，大家都不以為然。其實，對香港來說，第4級別旅遊警告大鑊過10號風球，當中第4級別有什麼國家，講出嚟大家都嚇一跳，當中包括朝鮮及伊朗。當第4級別警告發出之後，在香港的外資僱員就要被迫離開香港，否則有乜「依郁」，或影響保險賠償。其實，在第4級別之下仍然有咁多人留在香港，可以知道香港的重要性，不同意的人可以話我自吹自擂。

美7月降港旅遊警告級別

問外資撤離香港之後會去邊度，10個之中有9個話去新加坡，搞到新加坡豪宅供應短缺，租金大升，各項民生消費大升，甚至將香港金融中心地位取代，「紐倫港」變做「紐倫新」。不少人好似陶淵明咁樣，好讀書「不求甚解」，只識得話香港冇啦，連金融中心地位都畀新加坡搶走，從來不提第4級旅遊警告。

在哈馬斯突襲以色列之後，美國發出旅遊警告，呼籲國民前往以色列需更加謹慎，這是意料中事。但唔講唔知，美國在今年7月已經將香港旅遊警告級別改為第2級，雖然未到第1級別的自由前往，但只是叫打算前往的人要小心一些。中國內地及澳門則在第3級別，要再三考慮甚至更改行程，第2級別亦是外資回歸的主要原因。不過，我冇留意報紙是否有報道這個外資回流的重要信息，但在美國對香港發出第4級別旅遊警告時，全港報紙都大肆報道，似乎是不大公平。