《民意調查不會贊成撤辣》

在過去兩三個星期，有不少團體叫我一起與政府官員開會討論是否應該撤辣，我最初認為撤辣已是萬衆一心，原來不是，邀請我的團體根本不想政府撤辣，我覺得如果希望政府撤辣，千祈唔好同政府開會，亦唔好叫政府做民調，否則，當開完會及做完民調之後，政府會話民調顯示大多數人不贊成撤辣，至於開會結果，就有三分之二的人不贊成，結果是不撤辣，地產界人士願賭服輸。

所有業主贊成撤辣 仍難敵無樓人士

做民調是自欺欺人，香港有750萬人，只有125萬人有樓，扣除未成年人士，最少300萬人未有樓，他們當然不希望撤辣，因為在撤辣之後，樓價必然上升，他們買樓就要畀多好多錢，就算所有業主贊成撤辣，仍然大比數輸畀唔贊成撤辣的人，叫政府做民調即是不用撤辣。不過，地產界人士又唔係咁蠢，所以，從來沒有叫政府做民調，但亦唔係太精明，地產界要求與政府開會討論撤辣事宜，地產界精英唔知道，他們咁樣做即是畀機會政府唔撤辣。

雖然是講關於地產辣招，政府會話不能只與地產投資界討論，應該包括其他投資組別，如果大家同意，就跌落政府佈局，假設分4組、每個組別有10個人，地產投資組別全數贊成撤辣，其他3個組別有2個人贊成，8個人不贊成，結果是有16個人贊成撤辣，有24個人唔贊成，只得三分之一的人贊成，政府大條道理唔撤辣。

其實政府撤又好唔撤又好，政府唔撤辣樓宇成交量一定大減，冇人買地，稅收又減少，樓價下跌，負資產者增加，政府都唔知點樣解釋，而且又冇得賴，最後唯有撤辣。所以，地產界唔理政府是最好辦法，做人是要有骨氣一些。