《不會擔心樓價下跌而賣樓》

我同老友講，在2003年之後，從未聽過一個人話擔心樓價下跌而賣樓，尤其是那些只得一個單位的業主，即使樓價下跌，如果供款唔脫期，銀行是不會逼業主賣樓，而現在賣樓的業主大多數都是因為個人財務出現問題。樓價下跌不會令業主出現財務問題，所以擔心樓價下跌而賣樓只是一個藉口，老友話我講得冇錯。

加按物業炒股損手 才要賣樓還債

我深知老友百足咁多爪，早年已非常低價買入不少優質物業，每月租金收入令他的生活過得非常富裕，但老友唔開心，認為做收租佬好似一個廢人。雖然每個月有百萬元租金收入，點用都用唔晒，但缺乏挑戰，於是加按物業買股票、買債券，甚至買虛幣，但老友唔知道，最簡單而又賺錢的投資其實是最困難，就好似賭錢，一倍一是最難賭。

老友其實與很多賣樓的業主一樣，將物業加按買股票、買債券，甚至買虛幣。我唔講大家都知道，在這幾年，如果買股票，即使買藍籌，隨時唔見一半，不少債券就算唔清零都要債務重組，虛幣反而不用擔心，買虛幣只是小注怡情，就算輸都唔輸得幾多。

此外，亦有不少業主買入高息金融產品，種類太多，不能盡錄。總之一句，如果可以取回本金，業主就沒有問題，否則業主可能要被迫賣樓還債。不過，就算賣樓還債，他們亦不會話自己投資失誤，只會話樓市下跌，一個自圓其說的大話而已。