《不做中 不做保 不要介紹裝修佬》

做媒人唔係一定是男女婚姻的事，介紹人買嘢，例如買虛幣，賺錢冇人會多謝你，蝕錢一定會畀人鬧。如果有介紹費，更加可能會惹上官非，介紹裝修師傅畀人，輕則老友都冇得做，重則被人告，做介紹人做到畀人告，十分不值。

別人裝修 勿意見多多

我又唔係未試過介紹裝修師傅畀人，很久之前，介紹一個裝修師傅畀朋友做裝修，不久之後，收到裝修師傅一個非常名貴禮物籃。打電話問裝修師傅，佢話我應得，我唔敢收，將禮物籃轉送畀那個朋友，並且同佢講，請佢跟緊裝修工程，有什麼事我不會負責任；如果他唔滿意，可以唔用那個裝修師傅，我負責所有損失，朋友話冇問題，我於是放心。

結果是裝修工程爛尾，老友梗係話裝修師傅做得唔好，接駁唔得，收口又差，唔打算畀尾期裝修費。裝修師傅則話老友腌臢聲悶，經常改意見，令佢做多不少工夫，而且又唔肯加錢，如果唔畀尾期，裝修師傅話會告老友。我知道之後都話自己好彩，如果我收了那個禮物籃，今日就畀雙方埋怨，好似那些JPEX嘅KOL，如果收了介紹費，今日「震過貓王」。

我有多少不明白，老友脾氣很好，要求不高，點解裝修師傅話佢腌臢，後來才知道，老友不時帶朋友去睇裝修，老友冇意見，但他的朋友有意見，本來已經做妥，又要拆過重做。現在老友對那些朋友亦有意見。老實說，別人裝修，如吹皺一池春水，關你何事，講多句都有可能得罪人。