《財爺不懂窮則變變則通》

現在有不少聲音要求政府撤銷特別印花稅，包括樓市與股市，唔知財爺是否借了聾耳陳隻耳，完全沒有反應，令到大家都非常失望。有老友問點解財爺唔肯撤辣，老友唔明白，財爺未窮過，唔知道窮則變、變則通這條大道理；老友唔同意，佢話財爺小時候家境清貧，點算未窮過？

我雖然話財爺不懂得窮則變、變則通這條大道理，但財爺長輩一定懂得，所以可以脫貧，例如做某樣小生意唔掂，立刻會轉行做其他生意，唔會死守下去。如果由財爺家人做財爺，見到股市樓市的辣招無效，就會立刻修改，在股市方面比較容易，只要撤銷最新加了的印花稅，或者可以令股市回復生機，就算唔得，都可以話曾經嘗試，平息一下民怨。事實上，股市就好似一部舊機器，冇壞就唔好搞佢，當日無端端加印花稅，令到股價由高位下跌四成，成交量更慘不忍睹。不過，唔做都做咗，最好辦法都是撤銷昔日加了的印花稅，就算死馬當活馬醫都要一試。

股市要變，樓市更要變，否則樓價繼續跌，香港就會多了不少窮人。有錢人多數喜歡買物業，但可惜香港政府只懂得照顧冇樓人士，用盡方法幫他們買樓，其中一個方法是加其他人稅，包括外來人和已經有樓的港人的印花稅。本來無可厚非，但已幫了超過十年，正是長貧難顧，搞到香港自己都窮，在樓價下跌，成交量大幅減少影響之下，賣地收入大幅減少，現在係時候撤銷壓抑樓市辣招，釋放有能力買樓香港人的購買力，以及讓來港專才買樓，樓市一定止跌回升。

老實說，撤回股票已加的印花稅，我唔敢肯定是否可以令股市止跌回升，但撤銷樓市辣招，一定會令樓價上升、成交量增加。地產商恢復買地，香港財政收入有保障，辣招已經技窮，撤銷亦符合窮則變、變則通這個大道理。