2023/09/05
湯文亮
打風後回到公司開會，有同事話在打風期間，租客要求立刻做一些維修，我們實在冇辦法派到工作人員去處理；租客很唔滿意，發了一封信，要求我們賠償損失，否則就唔交租。
這些惡人先告狀的事，收租業主就見得多，例如話水渠淤塞，業主冇維修，他們理直氣壯唔交租，我們都遇上唔少，我的做法是以和為貴，我會同租客講，如果出律師信告我們，就要有心理準備我們不會續約。租客聽完，大多數會話萬事都可以協商解決，事情一定可以解決，發律師信只是律師的意見。
WTO不會受理中國禁進口日本海產
租客惡人先告狀就事小，一個國家惡人先告狀就事大，日本在8月24日唔理其他國家反對，將處理過的核污水排放入太平洋，中國立刻全面禁止日本海產進口，如果中國只佔巿場1%至2％，日本根本唔會理，但中國內地進口的日本海產佔日本出口量22.5 ％，全世界排第一，香港排第二，有19.5％，而排第三是美國，不過就大幅萎縮，代表美國表面上支持日本，其實就離棄日本，而日本得到美國支持，以為自己是做對了，於是打算告上世界貿易組織（WTO）。老實說，畀個天WTO做膽，都唔敢要求中國進口日本海產，萬一日本附近的放射性元素超標，令到很多中國人得到癌症，WTO就責無旁貸。
真係唔怕一萬、只怕萬一，有一隻放射物質「氚」數值近日大幅上升，雖然日本話仍未到達安全的下限水平，核處理水仍然是安全的，但排放了10日，就已經令「氚」數值大幅上升，多一兩個月，就到達安全水平上限，就算日本夠膽告上WTO，WTO都唔會受理，日本人只是打吓嘴炮，唔會真係採取行動，難道日本人唔知道是自己理虧？
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
