《地產商不如代減人才辣招稅》

近日同不少內地專才交流，他們都有打算在香港買樓，但考慮到要交30%印花稅，雖然可以在7年後取回，但除了即時要付一大筆錢之外，亦考慮到利息咁貴，如果利息唔跌的話，7年利息等於樓價12%，既然是香港政府話搶人才，點解又打來港專才的主意，做法非常矛盾。但如果唔買，7年之後，樓價隨時可以升30%至40%，他們就失去個人置業的最佳機會，希望我可以寫幾篇文章叫政府減辣，唔使他們交特別印花稅，只需要交正常印花稅便可以。

我話叫政府減辣難過登天，况且我沒有影響力。不過，窮則變、變則通，如果我是地產商，就會替政府減辣，買樓專才只需要交正常印花稅，其餘由地產商代繳，如果未來7年利率平均是每年3厘，地產商亦只是減收了樓價5%，現在回贈都唔止，况且在暫代印花稅之後，應該不用回贈給專才，到政府退稅當日，當然是退給地產商而非專才，雖然當中涉及一些法律程序來保障地產商，我相信問題不大，正所謂求人不如求己，要求政府減辣，不如自己減。

老實說，政府願意在7年之後退稅，就是畀地產商一個空間幫助專才減辣，如果政府即時豁免專才特別印花稅，樓價九成九會飈升，到時又會畀市民話樓是用嚟住，不是用嚟炒。

有初級官員同我講，政府不是不知道應該減辣，但奈何政府做事，愈正確，反對的聲音愈大，例如最近三條海底隧道新收費，都未開始，就已經話不但冇效，仲會令到三隧齊塞，開始咗之後反應唔錯，又話現在是暑假。其實，反對的人知道，新收費可以減輕三隧壓力，揸車的人都知道有效，所以，反對政府的人唔想政府去做，便有三隧齊塞講法。

辣招已經推行咗13年，對內地來港的人影響最大，令到他們不能享受香港樓價升值的成果，13年，政府亦應該知道樓價上升是供應不足，現在積存的新樓有很多，政府亦應該趁機會減辣，但官員們冇這個「吉士」，他們擔心在減辣之後被反對政府的人鬧到失魂。官員們可能唔知道，愈多人鬧，愈多人反對，愈代表政策有效。