《香港中產移英變基層》

中原指數三連跌，有人歸咎香港人沒有信心，寧願移民去英國，而離開的香港人當中有不少是有物業及其他資產，就算稱不上小富，但一定是中產。由於中產人士離開，不但會令供應增加，同時對樓宇需求減少，樓價又怎能不跌。

我絕對同意那些人睇法，但有一件事大家要明白，就是移民的人當中，中產人士佔了大部，因為基層未必想移民，况且香港失業率咁低，基層工作根本唔夠人做，既然搵工冇問題，點解要去英國做工？中產人士又唔同，他們認為在香港得不到自由發揮，未能一展抱負，而且大多數有一個自住單位，賣了之後移民去英國，不但可以買較大單位，並且可以做自己喜歡工作，甚至可以不用工作，直至儲蓄用完，才重新開始。

簡單來說，香港中產去了英國，幾年之後就會變成基層，就算返香港都很難再做中產，理由是很難再買樓，沒有樓，又如何將一個基層變成中產。

有人話，就算唔去英國，樓價係咁跌，中產都會變基層。咁樣講太過武斷，在過去5年，任報紙講，只是有小部分樓宇樓價跌了10幾個巴仙，比例是1比9，如果跌10幾個巴仙就會由中產變基層，代表中產基礎很脆弱。

反之，投資股票或者債券的中產，真的是有機會變基層，5年前恒生指數三萬三，今日一萬九，唔見了四成，如果炒吓margin，很容易變成「柳毅全輸」，如果中產冇了股票，而自己又租樓住，真係唔想變基層都唔得。

不少中產人士有一個單位，但會利用餘額借錢買債券，本來冇問題，誰不知美聯儲局暴力加息，令債劵價格大幅下跌，如果買正瑞信等，就連渣都冇，那些中產業主如果無端端加大債務，隨時連中產都做唔到，這是中產消失的原因之一。

正所謂「一雞死、一雞鳴」，自從政府搶人才之後，已經有超過10萬申請者，如果他們成功來香港工作及居住，以他們的收入，很快會變成中產；所以，大家又不用太悲觀，一切事物，有失才有得，中產人士也不例外。