《優質客戶 是銀行職員資產》

老實說，我都唔明白，我亦要面對同樣問題，但我了解一件事，就是在職場上，銀行業的人士非常搶手，如果轉工，隨時會加薪兩成。至於銀行哪個部門的員工最搶手，當然唔會是WFH或者不時「將人軍」的風管部員工，而是那些擁有優質客戶的營業部職員，如果那些職員打算轉工，又點會替自己客戶申請加額，係都等到轉咗工先做，唔會咁蠢將自己優質資產送畀銀行。

銀行對新客好過對舊客

全世界銀行都有一個毛病，就是對新客戶好過對舊客戶，就算申請信用卡都是一樣。唔知點解，銀行對來往愈耐的客戶愈冇信心，即使客戶在期間從未拖欠供款，舊客戶申請加額大多數有去冇回，甚至話銀行唔追數已經好彩，仲講申請加額？但對於新做按揭，又借得多，又可以有回贈，所以，客戶如果希望申請多一些貸款，轉按是一個可行辦法；不過，如果貿貿然轉按，銀行亦會有戒心，如果由原有貸款銀行職員引薦，成功機會亦大一些，更何况那名職員是高薪挖角返嚟，如果唔做生意，豈不是搵自己老襯。

大家又不用擔心原有銀行的生意少了，其實不過是執過位、起過風，銀行又可以聘用其他銀行的職員，對於他們介紹的生意，大多數唔會拒絕。在這個形勢下，即使金管局放寬逆周期措施，銀行亦沒有多做生意，我相信不用太久，尤其是在利息穩定之後，銀行對於物業放貸比較放鬆，不過大家要有心理準備轉去其他銀行做按揭。

同老友傾偈時，有名店的售貨員搵我，話我睇啱隻表公司唔可以畀折扣，但他很快轉工，新公司可以畀7%折扣，其實並不是舊公司唔肯畀折扣，而是售貨員帶客轉去新公司。