《點解咁少印度人買樓收租》

我同意老友所講，印度人的確好叻做生意，有時叻得太犀利，聰明反被聰明誤。有租客同我講，以前他是租印度人的物業，第一張租約冇問題，到了續租時，印度業主遲遲未開出新租金，只是叫他放心，到了租約期滿前幾日，業主卒之開出了新的租金，竟然比市值貴20%，講到牙血都出，都只肯減5%，租客已經肉在砧板上，想唔簽都唔得。到了再續租時，租客已經有心理準備，早早搵了樓，但遲遲唔通知業主，到印度業主開出新租金時，租客話自己負擔唔起，在租約到期就會搬走，久而久之，那位印度業主見自己的物業太多空置，所以索性唔買樓收租。

在過去六七年，有多達2000家外國企業離開印度，終止與印度的合作，包括鴻海退出合資晶片廠計劃等，而小米等企業則被罰巨款。印度領導人認為，外資在印度設廠，已是囊中物，最後，迫使對印度充滿信心的外資離開。

其實，外資唔知道，在印度領導人眼中，他們只是「租客」，所以在最初傾談時沒有問題，不但批地，而且仲有補貼，但當進入了印度之後，那些批地、補貼變成空中樓閣，但各項所需資金及稅項不斷湧出來，最後迫使外資離開，所有設施「收歸國有」，在印度人眼中是一大勝利。但亦嚇怕打算去印度投資的人，沒有人投資，就好似層樓空置，雖然可以攞到租客所有設備及裝修，不過冇租金收入，又點可以話自己贏。