《特首如兼任金管局總裁大件事》

星期六早上，有老友到公司吹水，佢問我在什麼情况下會移民？我話除非特首做埋金管局總裁個位，代表香港的經濟情况不但很差，而且根本不受控制，可能要用政治手段解決，冇人願意做爛頭卒，特首唯有親自落場。老友話我咁樣講，即是永遠不會移民。

老友可能唔知道，如果我是新加坡人，我就唔會咁講，否則就真係要移民，因為已經欽點為下任新加坡總理，現任副總理兼財長黃循財，在7月8日已經兼任新加坡金管局主席，我問過幾名新加坡朋友，他們都唔知道箇中原因，或者他們知道都唔會講畀我知。其實，唔使他們講，我都想到就是新加坡的經濟情况出現變化，上任金管局主席尚達曼「劈炮唔撈」，而又冇人願意接手，黃循財唯有勉為其難。老實說，如果這件事發生在香港，評分機構一定會減好多分，但發生在新加坡當然冇事。

本來，新加坡未上任總理兼任金管局主席是新加坡內政，正是吹皺一池春水，但近日新加坡發生不少事，部分與香港有關，所以稍為關心一下，例如淡馬錫主權基金資產縮水5%，或250億坡元，雖然話投資輸贏，閒過立秋，5%當然問題不大，但如果陸續有來，咁就大件事，因為有不少香港人投資新加坡基金。

香港報紙話新加坡基金唔睇好香港樓市，所以寧願撻訂20億元，都唔成交長實（1113）波佬道單刁，我覺得香港報紙經常是長他人志氣滅自己威風，如果發生在新加坡，當地報紙就會話香港集團冇錢成交，而非唔睇好新加坡樓市。

銀行打開門口，會唔會唔做生意？在香港，新加坡銀行將私人住宅按揭利息加兩厘，即是唔想做生意，如果不是有特殊原因，我相信新加坡銀行是不會加息，現在反而是借了錢的客戶有少少擔心，銀行會不會加息甚至要他們還錢。

最後，新加坡貪污調查局磨劍40年，為一宗貪污事件拘捕新加坡高級高員，如果是單一事件還好，如果是眾多貪污事件之一，咁就大件事。由此可見，由未來總理兼任金管局主席是有必要的。