《投資者最驚被人「擺地攤」》

我非常奇怪物業代理叫我賣樓，既然已經有投資者恐慌式出貨，代理應該叫我買樓，而非叫我賣樓，除非佢唔想做生意。

由此可見，現在並不是投資者恐慌式出貨，而是物業代理以恐慌式出投資者的貨，不過，大多數物業投資者都身經百戰，又捱過幾個難關，現在離最困難的時候還有很遠，根本毋須恐慌式出貨；否則，本來樓市唔會出現最困難時候，可能會在投資者恐慌式出貨之下出現，真係陸榮廷睇相，唔衰攞嚟衰。

我問物業代理知唔知投資者最怕什麼？佢當然唔知，就算知都話唔知。其實，投資者最驚被人「擺地攤」，意思是將某一個投資者的物業全部公開出售，並且歡迎買家出價。老實說，咁樣做即是話畀全世界知道那名投資者銀根短缺，試問所公開的物業，又點會賣得好價，或者可以賣走幾個最好的物業，但其他的只會愈賣愈平，甚至無人問津，所有投資者都知道這個道理，地攤式銷售反而做唔到好成績。

地攤式銷售 物業難賣好價

如果真係要賣樓，每一個投資者都有自己方法，不過，就算是銀根短缺，都唔會地攤式銷售，最多是攞幾個質素比較高的物業出嚟，價錢降低一些，佣金畀高一些，反而有機會可以賣得走。在賣家來說，太多選擇即是沒有選擇，物業代理的地攤式銷售，其實是打擊其他投資者或者業主的信心而已。