2023/06/29
湯文亮
有老友問財爺點解預先聲明，要同金管局商量放寬首次置業者的按揭成數。老友唔打麻雀，唔知道財爺正在打開口牌，向金管局施壓，金管局是不同意放寬按揭，但財爺承受各方壓力，因未能放寬按揭而資金受到影響的人正在怪責財爺，所以財爺話要同金管局商量。如果未能放寬，這是金管局的問題；如果放寬，財爺就會因利成便領了這個大功。所以，我估計金管局在無可奈何之下，被迫放寬首次置業者的按揭成數，繼而就會放寬所有物業的按揭成數，亦不是什麼大不了的事，修正逆周期措施而已。
老友話唔怕一萬，最怕萬一，萬一金管局堅持，財爺雖然可以卸膊，但仍然是很冇面。如果金管局不肯放寬，真的很大件事，代表香港政府的管治出現問題。簡單來說，金管局「兵變」，大家唔好以為好似瓦格納軍團的普里戈任，率領幾萬人揮軍莫斯科才叫兵變。
若不放寬首置按揭 料有人解甲歸田
如果普京叫唔郁其他軍區司令，無人願意抵抗普里戈任，那些軍區司令亦是兵變，擁兵不發者也是兵變，估計其他軍區司令已宣誓效忠普京，所以普里戈任才率領瓦格納軍團返回軍營，最後仲要解散瓦格納，自己則解甲歸田，這就是兵變的代價。雖然普里戈任話自己冇兵變，但點解會由烏克蘭營地行兵700公里，直逼莫斯科，途中仲打落幾架飛機，令到13個飛行員陣亡，咁樣都唔係兵變，究竟點樣做才算是兵變？
我相信金管局唔敢「兵變」，財爺會與金管局總裁開會之後，就會宣布放寬首次置業者的按揭成數，如果唔放寬，兩人之中，起碼有一個，甚至兩個都要解甲歸田。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
