2023/06/02
湯文亮
我以前打麻將有一個習慣，就是上家出冲我不會食糊，因為我怕跟着自摸，即是打穿自己「戶篤」，雖然亦有錢收，但兩者相差幾倍，現在我已經唔打麻將。
有一晚同幾個老友在一個地舖食肆食飯，其中一個老友悶悶不樂，原來二十幾年前曾經買入那個舖位，在落了樓價5%訂金之後，唔夠一日立刻有人接貨，仲畀10%佢賺，物業代理話買一賠三，好過去搶，新買家買入之後租了畀人，現在舖位升值冇十倍都有八倍，所以老友悶悶不樂。
賣走優質物業 未必可以買番
這些事在物業投資界經常都發生，這叫做自己打穿自己「戶篤」，我自己都試過唔知幾多次，但想深一層，如果不是好嘢，點解咁快會有人畀錢我賺，所以，以後當我遇上同樣的事情時，我都會細心考慮，畢竟打穿自己「戶篤」是不開心的事，雖然是有錢賺，但是就會差很遠。
有人認為，有糊唔食，罪大惡極，有錢都唔賺對唔住財神，賺了錢有機會可以再買番，這個策略在股票投資還可以實行，但在物業投資就要認真考慮，畢竟遇上優質物業的機會不是太多，一般業主若非逼不得已，都不會出售手上最優質的單位。雖然話賺了錢可以第二日買番，不過就唔知等到幾時，最後買回一個比以前買走差很遠的物業，最後令到自己蝕本，這就是自己打穿自己「戶篤」的代價。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
