《香港人鬧國泰才可救國泰》

上星期六去食晚飯，見到服務員在上菜時不小心將餸菜倒落在一位客人身上，服務員不但冇講對唔住，仲話客人阻住佢上菜，經理見到二話不說，立刻炒了那名服務員。有不涉事的服務員話經理做法不近人情，應該調查清楚客人是否有阻住上菜，如果是客人的錯，應該是由客人講對唔住。經理話炒了那名服務員是幫了大家，如果他幫住那名服務員，甚至話客人不對，仲有冇人會幫襯，餐廳等執笠都得。

國泰（0293）發生「Carpet事件」之後，社會上鋪天蓋地鬧國泰，有人話使唔使咁大件事，搞到特首都要出面。其實大家鬧國泰是救了國泰，如果政府冇表示，國泰又話服務員冇錯，按照公司指引，航班只提供英語、粵語服務，如果唔識得這兩種語言，可能得不到要求的服務，如果國泰管理層咁講，國泰準備執笠。

基於顧客永遠是對的，國泰管理層一定會怪責自己員工，最緊要是香港市民，如果有不少香港市民話服務員冇做錯，只是內地人不懂英語及粵語，如果真的是這樣就很大件事，不單止國泰，就算香港都很大件事，仲點會有內地人到香港旅遊？好彩，今次除了國泰工會之外，根本沒有人話那幾名空中服務員做得對，而且鬧國泰的香港人很多，其實愈多愈好，多香港人鬧國泰才可以救國泰，很多大媽打仔時都會話如果佢唔打，被其他人打會更慘。

今次國泰「Carpet事件」，又並非全部壞事，正所謂大亂才可以大治，我相信國泰的確冇明文規定要求服務員識講普通話，而事實上大多數香港人都識得講普通話，就算要求都是多此一舉，現在被工會用作反擊武器，國泰以後就大條道理要求員工一定要識講普通話，甚至要作出培訓。事件之後，國泰股價下跌2.5%，有人擔心國泰一蹶不振，我認為未必會，以「寶馬雪糕事件」為例，當日寶馬股價即時下跌5%，現在比當日下跌前倒升8%。國泰是否會受影響，主要是睇國泰管理層以後點做，今次事件反而可以將國泰的傷患找出來。