2018/08/15
杜鳳儀
暑假仲有兩個多星期便結束了, 每日响面書見到同事、親朋好友、客戶等不停地响機場打咭, 睇到都開心. 點解之前一直都係講緊同業主、租客有關嘅保險個案分析, 無端端轉話題呢？
話說昨日有個陌生人同筆者講電話, 話題係關於旅遊保險, 有感而發覺得去旅行同好多讀者有關, 特別係好多家長都會安排同子女响暑假出遊, 咁不如今期同大家分享一下.
該陌生人係一個年輕女生, 透過網上平台接觸到筆者工作嘅公司, 諗住購買旅遊保險, 筆者被公司分配到聯絡這位潛在客戶, 年輕女生話俾筆者知, 佢最緊要就係份旅遊保險有冇包手機損壞/遺失, 其他嘅保障冇乜所謂, 筆者好奇問客戶用緊乜嘢牌子嘅手機？點解喱個保障咁重要呢？其實答案呼之欲出, 當然係接近一萬蚊嘅 ‘唉瘋10 ’啦. 大嗱嗱成萬蚊嘅手機, 壞咗或者唔見咗好肉赤架嘛! 緊係想有得賠番俾我啦！年輕人實在太年輕了.....
聽完之後, 筆者亞媽上身咁同喱位年輕女生講, 亞女, 一部手機嘅損失原來對你嚟講係咁重要, 假若有其他事發生個損失俾手機多十倍、二十倍, 甚至成百倍, 你會有乜感覺同埋你會點處理呢？佢嘅反應係會有d乜發生引致到咁大損失？唔好講咁多, 你公司保定唔保？抱歉, 敝公司真係唔保手機損壞/遺失嘅, 不過好想話你知旅遊保險最緊要嘅財務保障係d乜? Dodo姐賣廣告都有話, 出門記得買旅遊保, 意外嘅嘢, 咪就係意料之外囉.
隨便講講三、兩個理賠個案.....
客戶A先生, 去美國公幹, 中途轉內陸機, 飛機遇氣流突然急降, 耳仔即時痛到飛起, 落機後頂唔順要立刻去睇醫生連藥費$250美元, 公幹完返香港後需要搵專科醫生繼續跟進咗2個幾月, 前後用咗接近3萬港幣嘅醫療費用.
客戶B小姐, 帶父母去日本渡假, 爸爸浸浸下溫泉暈咗, 送到醫院救唔番, 遺體安排送返原居地(香港)兼賠咗120萬港幣.
客戶C先生, 同女友去自駕遊, 途中出意外, 响紐西蘭當地醫院住咗10日, 埋單接近10萬港幣.
理賠個案, 數之不盡.....
筆者個人覺得最重要, 反而係24小時緊急支援服務, 客戶50多歲男士到北京旅遊, 期間中風, 保險公司透過上述服務安排醫療專機返香港, 包部專機返香港講緊幾拾萬费用, 雖然未必令人傾家盪產, 但冇起上嚟可能得安信兄弟至幫到你.
點解筆者好強調無限額保障咁重要? 要買一定要揀無限額, 因為市場上有好多標榜保費平嘅公司, 但緊急支援服務係有限額嘅, 偶爾新聞報導都有消費者响旅遊期間發生嚴重事故時埋怨保險公司點解喱樣唔包, 果様賠得咁少？一切都係同保費有關, 有人會著眼响平20、30蚊果度, 筆者建議無謂慳咗粒糖, 到有事發生時輸咗間廠. 而且又唔係越貴越大保障, 市面上有保費合理、保障又大嘅旅遊保險計劃, 年輕女生聽到之後仿然大悟. 如果閣下都想知道各大保險公司嘅比較, 可以電郵留低聯絡資料, 筆者會電郵給你.
最後, 祝大家開開心心出門, 平平安安回家.
（文章內容純屬作家個人意見，並不代表本網頁立場）
贊助
