2023/05/15
湯文亮
有老友問我們公司有冇試過推行Work From Home（WFH），並且話這是世界大勢所趨，很快全世界會有很多公司要WFH，如果唔WFH，根本請唔到人。
我見老友講得咁嚴重，於是「以身試法」，自己WFH一個星期，期滿之後，我覺得自己很頹，鬚又唔剃，不修邊幅，如果去見客，可能會被人誤會是外賣老哥。
WFH第一日，有朋友知道我WFH，叫我去happy hour，我見又要換衫，又要坐的士到中環，大家見面又沒有目的，只是講埋一些無謂嘢，於是婉拒了朋友。但之後都有少少後悔，因為明知有一班老友正在劈酒，而我自己成晚在家裏，真係悶到發癲，心裡打算如果明天有人約我出去飲嘢，一定唔會托手踭。
到了第二日，自己在家裏百無聊賴，不斷食食食，又自斟自飲，到了下午，秘書提醒我晚上有一個約會，我知道自己當日食了很多，如果晚上又食，真係唔掂，於是叫秘書替我改期，決定明日返工。
「以身試法」 開會似跟唔上
到了第三日，唔知點解唔想起身返工，於是決定嘗試多一日WFH，首先唔亂食嘢，好不容易才到午飯時間，見到外賣小哥都唔知幾開心，一心等人搵我去飲嘢，但電話都冇一個，又冇WhatsApp，於是問其中一個朋友，佢話大家知道我WFH，決定唔騷擾我。唉，他們不知道，我其實很想有人騷擾我。
原來不但每逢佳節重幾斤，原來WFH也可以重幾斤，到了第四日，一心一意準備返工，但唔知點解，好似肥了少少，套西裝都唔啱身，於是決定做運動，WFH多一日，一邊WFH，一邊做運動。老實說，已經由早做到晚，一安士都冇減，心裏想，如果WFH一個月，豈不是要做過晒啲西裝。
到了第五日，與同事開Zoom Meeting，做今個星期總結，唔知點解，我好似跟唔上，究竟市場上有什麼變化，只有同事講，我做聽眾，到最後，我向各位同事報告今次成果。我只是話Work From Home行唔通，如果有人話行得通，佢準備以後唔使返工。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
