《寧跟紅 莫頂白》

我最初在澳門接觸賭博時，前輩教我一件事，就是跟紅冇問題，但千祈唔好頂白，很容易連老友都冇得做，因為頂白就是望對方死，對方唔死，就輪到自己死，所以沒有深仇大恨，就千祈唔好頂白。

有傳聞最近澳門一個賭廳，兩批人大打出手，原因是有一班人搵一個輸到發癲的人做燈，那人買莊，他們便買閒，結果是那人繼續輸，之後出手打人，大多數圍觀的人都企在被人頂白的那一邊。其實頂白並不是不可以，但唔好咁明顯，賭兩三鋪便應該走了，否則真係會被人打。

不少人在買樓的時候都有機會聽到身邊的朋友話，連你都買樓，如果我有樓都會賣，一句平平無奇的說話，隨時可以導致兩老友反目，原因是買樓的人覺得自己給別人當做燈，如果樓價繼續上升，搵人做燈的人會隻字不提，但如果樓價下跌，那人就算冇樓都會話好彩冇跟着買樓，否則就損失慘重，其實，那些人根本不打算買樓，亦不是搵人做燈，只是講一些風涼說話，但是他們不知道那句說話是非常得罪人。

物業投資者有一個不成文的規矩，就算合作買樓，在賣樓時都唔會賣畀對方，寧願平少少賣畀第三者，原因是能夠合作買樓的人，交情一定有番咁上下，如果賣給對方，日後無論升跌，一定會有一方有所損失，輸的一方不但心裏唔好過，而且無形中做了對方的燈，不如賣畀其他人，以後無論輸贏，大家仲係好朋友，不過，最好都係唔好合作買樓，免卻日後一些無謂煩惱。