《政府拒撤辣免認錯》

我唔明白地產建設商會一班人低聲下氣叫政府撤辣，彷彿是他們做錯，辣招是懲罰他們。其實地產商沒有做錯，就算錯都是炒家的錯，如果冇人炒樓，政府又點會推出SSD？老實說，政府當時出招真係手忙腳亂，SSD是穩定樓價措施，類似股票禁售期，當樓市下跌才可以發揮效力。我真的唔知邊位官員極力主張推出SSD，業主要坐多一會，正中炒家下懷，樓價繼續飈升，政府於是推出加強版本。其實，一開始推出加強版本便可以，何必多此一舉。

至於政府點解要推出辣招，根據政府所講，是打擊炒家，但民間的說法不同，沒有足夠土地供應，樓價才會上升，炒家睇到這個情况，掹車邊搵錢而已。事實上，樓價上升，政府應該負上最大責任，辣招只是買時間，令政府可以增加土地供應，但搞咗超過10年，到現在仍然要用辣招壓抑樓市，浪費了10年光陰。既然政府不願意撤辣，即是唔認錯，市民冇辦法逼政府認錯，但總有一日政府恨錯難返。

有人話政府應該減辣，我話減辣應該效法國家開放防疫政策，要全面開放，絕不拖泥帶水。當日國家果斷開放防疫政策，兩三個月之後，現在已經復常，如果國家逐少逐少開放防疫政策，國民到現在仍然生活在驚恐之中。

政府撤辣亦應全面，什麼SSD、BSD全面取消，初期一定會有多少震盪，在一年半載之後，一切便會復常，除非政府仍然未能提供足夠土地供應，否則樓價應該平穩發展。