《租舖你check我check》

有老友話我唔識股票，迫於無奈要集中做地產，我話對股票我都識少少，既然老友對股票咁有研究，不如我問一個問題，睇吓老友是否可以全部答中。

如果買工業股，究竟要注意什麼？老友諗都唔使諗話，一定是產品的買家，如果工業股的客戶是名牌，例如替LV、iPhone做代工，那隻工業股想輸都難，老友講得冇錯，這是一般分析師睇法。老實說，替名牌做代工有很多掣肘，價錢又奀，好睇唔好食，賺埋賺埋唔夠輸一次，這些事我都見唔少，但一般分析師唔會講出嚟。

唔check等於放棄自己權利
如果我準備入一個食肆租客，我很難知道他的客源，所以，我不會浪費心機去研究那個租客怎樣做生意，反而會睇那個租客所用的物料供應商，以及用什麼食材，是自己揀抑或由物料供應商交貨。如果那名準租客用的是一般物料供應商，而且是由供應商交貨，不會親自落手去揀，質素怎樣講都會差些少，有所謂力不到不為財，食材唔好，很容易得失了消費能力高的客人，入這一類的租客就要小心一些，不但條件要辣一些，而且請同事注意收租情况。

其實，世事是雙方面的，租客亦會打聽業主的財務狀况，如果情况不佳，物業變成銀主盤，雖然未至於會立刻被趕走，但對於一些維修上要求，銀主大多數不會理會。就算業主財政冇問題，租客都會打聽業主是不是炒家，入咗之後就會被業主高價出售，新業主想唔大幅加租都唔得，這個世界是你check我，我check你，如果唔check，即是放棄自己權利，出了事就唔好怪人。