2023/04/18
湯文亮
唔記得幾多年前，有新結婚老友話要到我家住一晚，原因是早一晚飲醉，被他的老婆趕了出來。我話香港地，留食不留宿，暫住一晚就恕難從命，不過，我有辦法叫佢老婆鋪紅地氈迎接他回家。老友話如果做到，請我食珍藏四頭鮑。
我同老友老婆講，今次佢放生老友，以後後患無窮。老實說，咁辛苦結婚為了什麼，就是可以名正言順要求老公返屋企瞓覺，如果因為佢老公飲醉酒而唔准佢返屋企瞓，以後佢老公唔想返屋企瞓就會早一晚飲醉酒，最好做法是立刻要求佢老公返屋企，並且保證，以後飲醉酒不會趕佢出街，而是唔准佢出街，這樣做包保佢老公以後唔敢飲醉酒。
較早前美國白宮發言人在發言時表示，如果有國家唔用美元交易，將會受到制裁，佢唔講還好，講完之後各國立刻加速本幣化，因為全世界國家都知道，可以隨時被美國制裁，如果唔鋪定一條後路，容乜易亡國。
美國同我老友老婆一樣，唔知道自己是霸王，老友老婆最高的權力就是要老友每晚都要返屋企瞓，而不是唔准佢返屋企瞓。美國的霸權就是要求全世界用美元，而事實上美國已經做到，但唔知邊個紅鬚軍師要求制裁俄羅斯，唔准俄羅斯用美元，俄羅斯當然是很慘，盧布一日下跌30%，效果似乎是很成功，但其他國家見狀，就契弟走得摩，令到美國即使暴力加息，亦不能令美匯上升。
其實，即使俄羅斯入侵烏克蘭，美國仍強硬規定俄羅斯用美元，美國就真正是霸王，暴力加息的效果亦會很顯著，美匯現在應該是130而非101，美國可以大搖大擺割韭菜。美國真係一個唔知道自己是霸王的霸王。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
