2023/04/17
湯文亮
星期日早上去到茶餐廳，見到有一個年紀比較大的客人非常開心，口沫橫飛，原來客人的兒子一家移民，雖然有叫佢一齊去，但客人話唔去，人生路不熟，又冇朋友，去嚟做乜？不如留港消費，又可以經常見到老友，吹下水唔知幾開心，而且有一半機會兒子會回流，不如等他們過咗去先，等五七年才考慮，不過，大多數都唔會過去。
老闆話客人講大話，唔去理由是唔想眼寃，因為他兒子兩公婆在香港有一份不錯職業，收入超過平均中位數很多，但移民之後，未必可以做番以前工作，要放下身段做非常基層工作，甚至做倉務員、外賣小哥等，而且收入大幅減少。按照常理來說，不會兩公婆一齊想移民，只是其中一個堅持，在生活不如理想之下，兩公婆難免有爭執，跟埋子女去移民隨時變成磨心。客人話全對，但又唔敢將實情話畀兒子知道，所以只能夠話恐怕人生路不熟，唔想移民。
父母大多數沒跟子女移民
有很多人未必知道，現在移民的人未必是政見不同，而是出於對父母的報復，原因是當日唔准他們去外國讀書，既然當日唔准，所以他們今日移民。不過，那些移民很快就會回流，否則就唔會有35萬人移民，隨時17萬人回流（可攞番消費券）這個情况。老實說，回流移民的父母大多數沒有跟埋去，否則的話，根都斷了，怎樣回流？
客人話「北漏洞拉」，即是從今日開始，他要盡做港人的義務，並不是增加工作，而是消費，不但多啲與老友聚會，而且仲要爭住埋單，唔好同別人斤斤計較，有時候被人搵老襯都好開心，所以，移民離開的人千祈唔好以為他們的父母很傷心。其實，一個人到晚年的時候，最緊要有「三老」，就是老伴、老本同老友，根本唔關個仔事，所以，做子女的放心去移民，就算回流都唔好咁快，畀他們的父母多享幾年清福，多盡幾年香港人責任，就是消費。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
